បុរសម្នាក់បានស្លាប់បាត់បង់ជិវិតភ្លាមៗ ដោយសាររថយន្តដឹកទំនិញ ឡើងចំណោតមិនរួចនិងរអិលថយក្រោយគិន

ខេត្តតាកែវ៖ ជនរងគ្រោះម្នាក់ បានស្លាប់បាត់បង់ ជិវិតភ្លាមៗមួយរំពិក ព្រោះរថយន្តដឹកទំនិញសេរីចាស់មួយគ្រឿងឡើង ចំណោតមិនរួច និងរអិលចុះក្រោម ស្របពេលដែលគាត់ នៅពីក្រោយរថយន្ត។

ករណីគ្រោះថ្នាក់ចរាចរណ៍នេះ កើតឡើងនៅវេលាម៉ោង ១៥និង៣០នាទី ថ្ងៃទី០៥ ខែវិច្ឆិកា ឆ្នាំ២០១៨ លើផ្លូវលំក្រាលគ្រួសក្រហមត្រង់ចំណុច ភូមិចំបកទឹម ឃុំគីរីចុងកោះ ស្រុកគីរីវង់ ខេត្តតាកែវ រវាងរថយន្តនិងម៉ូតូ ដែលមានទិសដៅស្របគ្នា។
អធិការរងនគរបាលស្រុកគីរីវង់ លោក ទៀ សូរិយា បានប្រាប់អោយដឹងថា រថយន្តបង្ករម៉ាកហ៉ីយ៉ាន់ដាយ២តោនកន្លះ ពណ៌ខៀវ ពាក់ផ្លាកលេខ ភ.ព៣ . ដ០១៤៦បើកបរពីជើងទៅត្បូងចំណែកអ្នកបើកបរមិនស្គាល់ អត្តសញ្ញាណនោះទេ ព្រោះក្រោយកើតហេតុ បានរត់គេចខ្លួនបាត់ស្រមោល។ ចំណែកម៉ូតូជនរងគ្រោះ ម៉ាកហុងដាវ៉េវពណ៌ខ្មៅ គ្មានផ្លាកលេខ បើកបរដោយឈ្មោះ ទុយ ស្វាំង ភេទប្រុស អាយុ៦០ឆ្នាំ រស់នៅភូមិពោធិ៍ ឃុំព្រះបាទជាន់ជុំ ស្រុកគីរីវង់ ខេត្តតាកែវ មុខរបរកសិករ មិនពាក់មួកសុវត្ថិភាពបានស្លាប់ នៅនឹងកន្លែងកើតហេតុ ។ អ្នកឃើញហេតុការណ៍បានប្រាប់ដែរថា រថយន្តបង្កបានឡើងចំណោតមិនរួច នៅចំណុចផ្លូវទួលរួចក៏បាន រអិលថយក្រោយកិនម៉ូតូនិងមនុស្ស បណ្តាលឲ្យស្លាប់ នៅនឹងកន្លែងតែម្តងទៅ។

ក្រោយកើតហេតុសមត្ថកិច្ច ស្រុកបានចុះដល់ធ្វើកំណត់ហេតុ និងបានប្រគាល់សពដល់ក្រុមគ្រួសារយកទៅធ្វើបុណ្យ តាមប្រពៃណី ចំណែកវត្ថុតាងរថយន្ត និងម៉ូតូត្រូវបានដកហូត យកមករក្សាទុកនៅអធិការដ្ឋាន នគរបាលស្រុកគីរីវង់ ដើម្បីកសាងសំណុំរឿង តាមនីតិវិធីច្បាប់៕