ប៉ូលីសខេត្តតាកែវឃាត់ខ្លួនបុរសម្នាក់រួមនិងកញ្ឆាជាង៥០គីឡូក្រាមនៅស្រុកគិរីវង់

 ខេត្តតាកែវ ៖ជនសង្ស័យម្នាក់ត្រូវបានប៉ូលីសស្រុកគិរីវង់ឃាត់ខ្លួន និងដកហូតកញ្ឆាស្រស់និងស្ងួតជាង៥០គីឡូក្រាមនៅចំណុចភូមិជ្រោយ ឃុំព្រះបាទជាន់ជុំ ស្រុកគិរីវង់ ខេត្តតាកែវ កាលពីថ្ងៃទី២៤ ខែកុម្ភៈ ឆ្នាំ២០២០ វេលាម៉ោង ១៥ និង ២២ នាទី ។លោក ឈៀង សុន ស្នងការរងនៃស្នងការដ្ឋាននគរបាលខេត្តតាកែវបានអោយដឹងថាការបង្ក្រាបនេះគឺធ្វើឡើងក្រោមការបញ្ជាផ្ទាល់ពីសំណាក់ ឯកឧត្តម ឧត្តមសេនីយ៍ទោ សុខ សំណាង ស្នងការ នៃស្នងការដ្ឋាននគរបាលខេត្តតាកែវ កម្លាំងផែនប្រឆាំងបទល្មើសគ្រឿងញៀន សហការជាមួយកម្លាំងអធិការដ្ឋាននគរបាលស្រុកគិរីវង់ បានចុះបង្ក្រាបករណីដាំដុះនិងរក្សាទុកកញ្ឆាខុសច្បាប់ ដោយឃាត់ខ្លួនបានជនសង្ស័យ០១នាក់មានឈ្មោះ វ៉ាន់ លីម ភេទប្រុស អាយុ៦៤ ឆ្នាំ  មានទីលំនៅនៅភូមិជ្រោយ ឃុំព្រះបាទជាន់ជុំ ស្រុកគិរីវង់ ខេត្តតាកែវ(ជាអ្នកដាំ)។ ព្រមទាំងដកហូតបានវត្ថុតាងរួមមាន កញ្ឆាស្ងួតចំនួន ១៥.០៥គីឡូក្រាម និងកញ្ឆាស្រស់ចំនួន ៣៥គីឡូ និងជញ្ជីងចំនួន០១។

បច្ចុប្បន្នជនសង្ស័យ រួមនិងវត្ថុតាងត្រូវបាន កម្លាំងជំនាញកំពុងធ្វើការសាកសួរ ដើម្បីកសាងសំណុំរឿងបញ្ជូនទៅសាលាដំបូងខេត្តផ្ដន្ទាទោសតាមផ្លូវច្បាប់៕